Qaraqalpaqstan Respublikasíníń Mámleketlik Bayraǵí

“Qaraqalpaqstan Respublikasınıń Mámleketlik bayraǵı haqqında”ǵı nızam 1992-jıl 14-dekabrde Qaraqalpaqstan Respublikası Joqarǵı Keńesiniń XII sessiyasında qabıl etilgen.

Qaraqalpaqstan Respublikasınıń mámleketlik bayraǵı Qaraqalpaqstan Respublikasınıń mámleketlik suverenliginiń simvolı bolıp tabıladı.

Qaraqalpaqstan Respublikasınıń mámleketlik bayraǵı:

Qaraqalpaqstan Respublikası aymaǵında ótkeriletuǵın xalıq aralıq konferenciyalarda, kórgizbelerde, sport jarıslarında Qaraqalpaqstan Respublikasın tanıtadı.

Qaraqalpaqstan Respublikasınıń mámleketlik bayraǵı tuwrı múyeshli borlat bolıp, ol aspan kók, toyǵın sarı hám jasıl reńlerdiń úsh gorizontal jolaqlarınan ibarat.

Toyǵın sarı reńiniń jolaǵın aq hám qızıl jiyekler menen ajıratıp turadı.

Ózbekstan Respublikasınıń hám Qaraqalpaqstan Respublikasınıń nızamları menen belgilengen bayram kúnlerinde – Qaraqalpaqstan Respublikası Ministrler Keńesiniń, rayon hám qala hákimleriniń qararları menen belgilengen oraylıq kóshelerde, maydanlarda, basqa da jámiyetlik orınlarda hám obektlerinde;

– Ózbekstan Respublikasınıń Prezidenti saylawı, Ózbekstan Respublikası Oliy Majlisiniń Nızamshılıq palatası deputatların, Senat aǵzaların, Qaraqalpaqstan Respublikası Joqarǵı Keńesi deputatlarınıń, xalıq deputatları rayonlıq, qalalıq Keńesleriniń deputatların saylaw yamasa referendum kúnleri dawıs beriw imaratları hám xanalarda kóteriledi;

– Qaraqalpaqstan Respublikası húkimetiniń buyrıǵı boyınsha;

– sport maydanlarında

– Qaraqalpaqstan Respublikasınıń chempionatları hám birinshilikleri, milliy saylandı komandalardıń qatnasıwında Qaraqalpaqstan Respublikası aymaǵında xalıq aralıq sport jarısların ótkeriw waqtında hám milliy saylandı komandalarınıń wákilleri bolǵan jarıs jeńimpazların sıylıqlaw máresimleri waqtında Ózbekstan Respublikası mámleketlik bayraǵı kóterilgennen keyin. Qaraqalpaqstan Respublikasınıń mámleketlik bayraǵı oǵan bolǵan tiyisli dárejedegi húrmet támiyinlengen halda ulıwmalıq bayramlar hám saltanatlı máresimler waqtında kóteriliwi múmkin.

Qaraqalpaqstan Respublikasınıń mámleketlik bayraǵı menen bir waqıtta bir neshe mámleketler hám (yamasa) xalıq aralıq shólkemlerdiń bayraqları kóterilgende Qaraqalpaqstan Respublikasınıń mámleketlik bayraǵı xalıq aralıq huqıq normalarına muwapıq kóteriledi.

Qaraqalpaqstan Respublikasınıń puqaraları, sonday-aq, Qaraqalpaqstandaǵı basqa da adamlar Qaraqalpaqstan Respublikasınıń mámleketlik bayraǵın húrmetlewi shárt.

Qaraqalpaqstan Respublikasınıń Mámleketlik Gerbi

“Qaraqalpaqstan Respublikasınıń mámleketlik gerbi haqqında” gi nızam 1993-jıl 9 -aprelde Qaraqalpaqstan Respublikası Joqarı Sovetiniń 12-májilisinde qabıl etilgen.

Qaraqalpaqstan Respublikasınıń mámleketlik gerbi Qaraqalpaqstan Respublikası mámleketlik suverenliginiń nıshanı bolıp tabıladı.

Qaraqalpaqstan Respublikasınıń mámleketlik gerbi oń jaǵı salı masaqlarınan hám shep jaǵı paxta xanaları ashılǵan ǵawasha shaqalarınan ibarat sheńber menen qorshap alınǵan tawdıń arjaǵınan shıǵıp kiyatırǵan quyashtıń, Ámiwdárya menen Aral nıshanı bolǵan dáryanıń hám teńizdiń táriyplemesinen ibarat.

Gerbtiń joqarı bóleginde segiz qırlı juldız bar, oǵan bes juldızlı yarım ay salınǵan. Gerbtiń dál ortasına baxıt hám erkinlik nıshanı – qanatı jayılǵan Qumay qus táriyplengen.

Qumay qustıń arqasında Qaraqalpaqstan xalıqlarınıń áyyemgi mádeniyatınıń, ózine tán túp-tamırlarınıń birliginiń nıshanı bolǵan Qorǵantaw táriyplengen.

Arqa fonda Qaraqalpaq xalqiniń eń áyyemgi mádeniyatlarınan biri bolǵan, Qaraqalpaqstan xalıqlarınıń áyyemgi mádeniyatı hám ayriqshalıǵı ramzi bolǵan Shılpıq oxra reńindegi qala tawı jaylasqan.

Tómende Qaraqalpaqstan Respublikası mámleketlik bayraǵınıń nıshanı bolǵan gúlsheńberi jiyeginiń túyilgen jerinde «Qaraqalpaqstan» degen jazıw bar.

Qaraqalpaqstan Respublikasınıń puqaraları, sonday-aq, Qaraqalpaqstanda turǵan basqa da shaxslar Qaraqalpaqstan Respublikasınıń mámleketlik gerbin húrmetlewi shárt.

Qaraqalpaqstan Respublikasınıń Mámleketlik Gimni

«Qaraqalpaqstan Respublikasınıń mámleketlik gimni haqqında»ǵı Nızam  1993-jıl 24-dekabrde Qaraqalpaqstan Respublikası Joqarǵı Keńesiniń XIV sessiyasında qabıl etildi.

Muzikası – Najimatdin Muxametdinov

Sózi – Ibrayim Yusupov

Jáyhun jaǵasında ósken bayterek,

Túbi bir, shaqası mıń bolar demek,

Sen sonday sayalı,  quyashlı elseń,

Tınıshlıq hám ıǵbal sendegi tilek.

Naqıratı:

Diyqan baba nápesi bar jerinde,

Juwsan ańqıp,  kiyik qashar shólinde,

«Qaraqalpaqstan» degen atıńdı,

Áwladlar ádiwler júrek tórinde.

Aydın keleshekke shaqırar zaman,

Mártlik miynet,  bilim jetkizer oǵan,

Xalqıń bar azamat,  dos hám miyriban,

Erkin jaynap-jasnap,  máńgi bol aman.

Naqıratı:

Diyqan baba nápesi bar jerinde,

Juwsan ańqıp,  kiyik qashar shólinde,

«Qaraqalpaqstan» degen atıńdı,

Áwladlar ádiwler júrek tórinde.